អ្នកលេងហ្វេសប៊ុកប្ដឹងកញ្ញា ធី សុវណ្ណថា ទារ ៥០០ លានរៀល
ភ្នំពេញៈ អ្នកលេងហ្វេសប៊ុកម្នាក់ពីម្សិលមិញបានដាក់ពាក្យប្ដឹងកញ្ញា ធី សុវណ្ណថា ពីបទបរិហារកេរ្តិ៍ និងបទញុះញង់ឲ្យមានការរើសអើងដោយទារសំណងជំងឺចិត្តប្រមាណ ៥០០ លានរៀល ប៉ុន្ដែកញ្ញា ធី សុវណ្ណថា អះអាងថា ខ្លួនមិនចាប់អារម្មណ៍។
លោក សុខ សុវណ្ណវឌ្ឍនាសារពង្ស ដែលមានគណនីហ្វេសប៊ុកឈ្មោះ (Willian Guang) បានប្រាប់ភ្នំពេញប៉ុស្ដិ៍ថា ការប្ដឹងនេះដោយសារកញ្ញា ធី សុវណ្ណថា បានសរសេរពាក្យលើហ្វេសប៊ុកមួលបង្កាច់ បង្ខូចកេរ្ដិ៍ឈ្មោះ និងញុះញង់ឲ្យមានការរើសអើងក្នុងន័យនយោបាយ និងបំពានសិទ្ធិឯកជន។
លោកបន្តថាលោកបានដាក់ពាក្យបណ្ដឹងនេះទៅដល់សាលាដំបូងរាជធានីភ្នំពេញដោយអ្នកទទួលបណ្ដឹងថានឹងចាត់ចែងតាមនីតិវិធីច្បាប់។
លោកថា៖ «ខ្ញុំបាទស្នើសូមតុលាការដែលឯករាជ្យដូចបានចែងក្នុងរដ្ឋធម្មនុញ្ញមេត្តាជួយរកយុត្តិធម៌ផ្ដល់ដល់រូបខ្ញុំបាទក្នុងភាពជាជនរងគ្រោះម្នាក់…ដែលត្រូវបានគេរំលោភបំពានដោយជនមានអំណាច»។
យ៉ាងណាក្ដីកញ្ញា ធី សុវណ្ណថា ប្រធានអង្គការយុវជនកិច្ចការសង្គម និងជាប្រធានគណៈកម្មការយុវជនសាខាបក្សនៃគណបក្សប្រជាជនបានប្រាប់ពីម្សិលមិញថា កញ្ញា មិនចាប់អារម្មណ៍នឹងរឿងនេះទេព្រោះមុនពេលនាងសរសេរអ្វី ឬធ្វើអ្វីនោះមានភ័ស្ដុតាងត្រឹមត្រូវ និងគិតច្បាស់លាស់ហើយថា Willian Guang ក៏ត្រូវរងបណ្ដឹងពីនាងជាច្រើនដែរ។
កញ្ញាបន្តថា William Guang គួរតែបញ្ឈប់ជាបន្ទាន់នូវការឌឺដង ប្រើរូប និងឈ្មោះនាងក្នុងន័យបរិហារកេរ្តិ៍តទៅទៀតព្រោះនាងមិនធ្វើនយោបាយបែបលាក់ឈ្មោះលាក់ប្រវត្តិទេ។
លោក អ៊ី រិន្ទ អ្នកនាំពាក្យសាលាដំបូងរាជធានីភ្នំពេញ និងលោក លី សុផាណា ព្រះរាជអាជ្ញារងពីម្សិលមិញមិនអាចសុំការបញ្ជាក់បន្ថែមបានទេ ព្រោះទូរស័ព្ទមិនមានអ្នកទទួល។
តាមខ្លឹមសាររបស់ កញ្ញា ធី សុវណ្ណថា បានសរសេរលើហ្វេសប៊ុកពីថ្ងៃ ៣០ មករាឲ្យ «លោក គីវណ្ណា (William Guang) បញ្ឈប់ជាបន្ទាន់ការឌឺដង ប្រើរូប និងឈ្មោះនាងខ្ញុំបរិហារកេរ្តិ៍។ ខ្ញុំមិនធ្វើនយោបាយបែបលាក់ឈ្មោះ លាក់ប្រវត្តិរងពាក្យបណ្តឹងបោកប្រាស់លុយគេ ជាច្រើននាក់ និងតែងតែ “រើផ្ទះ” ស្ទើររាល់ខែដូចលោកទេ…»។
ចំណែកក្នុងពាក្យបណ្ដឹងលោក សុខសុវណ្ណវឌ្ឍនាសារពង្ស ប្ដឹងពីបទបិរហារកេរ្តិ៍តាមមាត្រា ៣០៥ និងបទញុះញង់ឲ្យមានការរើសអើងតាមមាត្រា ៤៩៥ នៃក្រមព្រហ្មទណ្ឌ និងថាសំណងនឹងជូនមន្ទីរពេទ្យគន្ធបុប្ផាដើម្បីប្រើជាប្រយោជន៍សាធារណៈ»៕
ប្រភព៖Phnom Penh Post
Comments
Post a Comment